Le Poesie di Giovanni

 

 

EL PUNT DE MILAN

A Meregnan gh'è tanti riôn

ma vün sul el g'hà la mia atensiôn

perchè chi sunt nasüd, pasad oramai tanti ann,

el riôn lè quell del “Punt de Milan”.

Adrè ala strada che dai Fulini la va al quartier,

traficada incö cume ier,

diversi curtij faseven la sua aparisiôn

da la curt del Magnan a la curt del Falcôn.

Gh'era la curt del soculè e di Vanett,

la curt del Bigin e quêla del Sachett.

Pö gh'era tanti butèg, usterij, artigian:

el Belocchio prestinè, i Fasö urtulan.

El feramenta Ambrusett, la pusteria Murèli,

el Vidali mubiliè, el Munghi, la merceria Prinèli,

el Quatrin lüstrù, l'usteria del Genio, el macelar Durnin,

la traturia Vittoria, l'Arensi e la Butunin.

Parlem no pö de la gent: i Baloss

che per un nient se meteven i man a doss.

Lauradûr. Omen de oficina

che ala dumenica ciapeven la gajna.

E i donn? Fort. Donn de carater

che gh'è meteven pocch a diten quater.

E una marea de fioeu de ogni età

tuti insema in strada a giügà.

E pö la Madona del Carmen cunt la prucesiôn....

e chi me fermi se non me vegn el magôn.

Perchè anca se pian pian

el riôn del Punt de Milan

l'han miss a post, gh'han cambiad la pell,

el s'è ingrandid, l'han fai pussè bell

el me ricord el va a chi temp là

quand anca mi stevi li de cà.

 Profilo

EL FIOEU DEL PUNT DE MILAN

L'è una dumenica de elesiôn

e quel dì li in curt del falcôn,

el desdott april del quarantott,

vegnüd al mund un bambulott.

Rarament s'è vist un fioeu insci bell,

bianc e rosa, biund, cicciutell

l'è la gioia dela mama e del papà

el pacia, el dorma, el fà no tribülà.

El cress ala svelta insema ai baloss,

el giüga ala lipa, el noda in di foss,

ma un bel dì, cunt alter Meregnanin,

el và a stà de cà giu al Casarin.

Chi el diventa un bel giuinott,

el laura del dì, el và a scola de nott

ed a un certo punto el se mett a murusà

una biundina dela scala A.

La san tücc cume i finissen chi rob li:

davanti a un pret a dì de si,

a giürass eterno amûr

denans ai omen ed al Signûr.

E a dess che pasas tuti sti ann

ch'el fioeu chi del punt de Milan

quand la sua vita ghe turna ala ment

ghe pensa no a sura el dis: sunt cuntent.

  Profilo

LA CURT DEL FALCÔN

El mè nom l'è Giuan Alon

e sunt nasüd in curt del Falcôn

in un riôn de Meregnan

cugnusud cume “el punt de Milan”.

In un curtil cunt la ringhera

due da matina a sera

se sareva no l'üss de cà

per pagüra che vegneven a rubà

gh'è steva una trentena de famili

cunt cinqu gabinett, tanti ripustili

e una dunsèna tra masch e tusann

che feven semper un gran bacan.

Me ricordi cume se füss ier

quand se truevum tüti in quartêr

per cures adrè inturna al palosôn,

divertis cunt la lipa o el carelôn.

E quant giügà a saltà la corda, al mund, al balôn,

a scundes, a figürin, ai quater cantôn.

Me suvegn anca de quand curevum adree al serc cunt sü i socul

e de quand ala dumènica per la tumbula i don feven el rocul.

Che bei temp!! Ah se pudessi turnà indree.....

Perchè anche se alura gh'era minga de danee

trii rob gavevum in gran quantità:

el rispett, la fiducia e la dignità.

 Profilo

            

28 APRIL 1973

Che acqua che vegn 'sta matina

e da mes'ura la mè nonina

la va a dré a burbutà:

“me racumandi incoeu fà no tribülà”.

Anca la mè mama l'è tuta in agitasiôn:

“vestiset ala svelta, te faij culasiôn?”

Ala porta se sent un “drin”.

Vu a vedè, hien i visin

che cumincen a salüdam,

brasam sü e poeu basam

e cunt lûr rivad anca i parent

ben vestid e tücc cuntent.

Intanta el capo famiglia

el tira sü una quej butiglia:

“auguri, un brindisi, cin-cin”

Ma l'è el caso de fà tantu casin?

Che bisogn g'hè de tutt stû sciam?

Forse perchè incoeu g'hû de spusam?

Suna vündess ur, bisogna andà.

E intant che foeura el và a vanti a diluvià

num, cume in corteo e pian pian,

andem vers san Giuann.

Lì, quand sem rivad e come si usa

vû in gesa a spetà la spusa.

Dopu un bel pû riva la prumessa

e insci el pret el pô cumincià la messa.

Al mument de scambias i anej

i parent, semper quej,

se meten tüti a caragnà

e intanta de luntan se sent a trunà.

Finida la funsiôn e vist che pioeuv no tant

andem de cursa al risturant

dûe, dopu i futugrafij de rito

disum a tücc “buon appetito”

e quand émm finid de mangià,

se metum adree tüti a cantà.

Cunt 'sta bêla cumpagnia

pasum la sira in allegria

e finid i festegiament,

turnum a cà, finalment.

La giurnada incoeu l'è staj düra

e da duman cumincia l'aventüra.

 Profilo

EL MERCAA DE MEREGNAN

G'avevi forse düü o tri ann

quand cunt mia nona, man nela man,

andevum al mercaa per fà la spesa

e fermas un atimin in gesa.

Me piaseva fin de fioeulett

girà in mess ai banchètt

che vendeven stofa, scarp, fasulett,

piatt, camis, müdand e calsett.

Poeu pasevum nel' altra piasa, quèla di nimai,

perchè gh'era fruta, verdüra, furmag, galin e gai

e due i meregnanin se incuntreven, semper lì,

tuti i dumenic e tuti i giuedì.

Incoeu ne pasad de ann e sunt in pensiôn

ma mantegni ancamû la tradisiôn

de andà sul mercaa e truà per strada

un quaidün per fà una bèla ciciarada.

Questa üsansa a Meregnan

la và avanti da un quei cent'ann

tanto chè el mercaa per la populasiôn

l'è diventad un mument de svag e de agregasiôn.

 Profilo

 

EL PERDÔN L' E' A MEREGNAN

El giuedì de Pasqua, da un quei cent'ann,

se festegia a Meregnan

non el Santo Patrôn

ma la Bula del Perdôn.

L'è festa granda per i meregnanin

e tüti, grand e picinin

van sula fera per curiusà

se gh'è una quei nuità.

Espusisiôn de merce varia, banchett de caramèll

dala piassa granda sü sü fina in castèll

dûe visin ai stend di vari asuciasiôn

te trövet chi vend la purcheta e chi el filsôn.

Giû nela fossa, per la gioia di fiulìn,

meten i cavai, i vacch e i pegurìn,

al Trombini gh'è la mustra di bonsai

e i tratûr se tröven in piassa di nimai.

Intanta che el sindech cunt alter autorità

finissen el gir di vedrin de premià,

nel maniero vegn numinad

un benemerit cume “perdunad”.

Sûna mèss dì e prima dela büseca, cume l'è l'üsansa,

se passa da san Giuann a ciapà la perdunansa

perchè iêr, cume incoeu e anca duman

el Perdôn l'è a Meregnan.

 Profilo

LA ME' MIEE

Per favûr un atim de atensiôn.

G'hû de div una roba: me pias i don.

Me piasen grand, me piasen bass,

me piasen magher, me piasen grass,

me piasen brütt, me piasen bej,

me pias supratütt quej

che cunt el fisich mingherlin

paren semper nuelin.

Me piasen negher, me piasen biund,

me pias i don de tütt el mund

ma nisüna me pias püsee de le,

ebbene sì el cunfesi: l'è la mè miee.

  Profilo

EL NATAL

Quand vegneva el Natal cume l'era bèll.

Cunt el paltô, la sciarpa, iguant e el capèll

andevum ala nuena in San Giuann

e serum in tanti tra masch e tusann.

Dopu ”Tu scendi dalle stelle” e alter patér

cunt i ball de nev in strada fevum i guérr.

Giüghevum suta la fiôca, avanti e indrè

fina che te vegneva no i gelôn ai pè.

Perchè bisogna ricurdal

che a chi temp là l'era debôn un bianco Natal

cunt cavalad de nev, candilott de giass

e num che fevum i sgüier in més ai piass.

Poeu finalment el 25 matina

in un cantôn là in cüsina

visin al presépi o suta l'albero de Natal

te truevet i bumbôn e un bell regall.

L'era talment tanta la cuntentéssa e l'emusiôn

che quasi quasi te vegneva el magôn.

Ah... beada gioventü !!

Oramai sem vécc e se la cüntum sü.

Sem semper chì a fà paragôn tra incoeu e ier

ma per dila propi tuta, da sincer,

anche se vivum nel beneser e nel prugress

serum püssè cuntent alura che non adess.

 Profilo

EL LAURA' A MEREGNAN

Una volta gh'era tanti fabric a Meregnan

e cunt el laurà g'avevum garantid anca el duman.

Adèss invece la città s'è cunvertida al tersiari

e inscî se perdü un sacch de post tra impiegad e uperari.

Gh'era la Brogi-Isar, la Munti & Martini,

la Chimica, l'Enel, la Tamini.

El Massa, i Belinsona, la Mulinari & Tansin,

la Tuta, i Pedrett, l'impresa Camanin.

Gh'era anca i Belom, i Del Corno, i Murusin

e tanti alter tra artigian e picul oficin.

Incoeu de tüti questi ne restad forse vün o düü

perchè i alter cunt el temp han saràd sü.

Tant che adèss el laurà la dann quasi dumâ i istitusiôn:

el Comün, la scola, l'Asl, i vegiôn.

In compens han dervid tanti negôsi e anca

agensij immobiliar e sporteij de banca.

Pora nümm! Due andarem a finì

se andem avanti de chel pass chì.

Perchè se sigüta a mancà quei che fann la prodüsiôn

aumenterà semper püssè el disagg e la disocupasiôn.

 Profilo

EL TRUMBÈ

Capita a volt in ogni cà

che a gh'è la necessità,

perchè s'è rutt el water o el bidè

de duè ciamà el trumbè.

Per avegh ala svelta una riparasiôn

ghe vor a volt la racumandasiôn

ma quand el vedum rivà cunt la bursa sui spall

ed in man la prüsiana o el papagall

el ricevum cunt tuti i unur

cume s'el fuss un gran dutur.

El tira föra i ferr del mestè

e dopu un atim el se met adrè

cunt calma a guardà

quel che gh'è de riparà.

Ala caldera el fa un by-pass,

al furnell el cambia la cana del gas.

Gh'è un col d'oca de giüstà

e anca un niples de cambià.

A un tübu el rifà el filett,

in bagn el sistema un rubinett.

Al lavandin, due gh'è el sifôn,

el cambia tuti i guarnisiôn.

Quand l'ha finid

el tuca cunt i did

per vedè se li suta

l'è sücc o perd una quei guta.

L'ha fai tutt cunt bravüra

e adess el presenta la fatüra

e questa si oih che dulur....

a l'è degna d'un prufesur.

Daltronde l'è un mestè che i fioeu voren pü fà

ciapad cume hien cunt l'università

due dopu sacrifisi, master e specialisasiôn

se truaran iscritt ai list dela disocupasiôn.

Invece el noster trumbè

che l'ha fai un'arte del sù mestè

el g'ha minga de preocupasiôn

perchè, anca se sem in recesiôn,

prima o poi un queidün el ciamerà

e lu el sarà mai sensa el laurà.

 Profilo

LA TANGENSIAL DE MEREGNAN

Me ricordi che cinquant'ann fà

i dueven cumincià

la bretèla che da Meregnan

la porta a Cultüran.

Emm vist ses Papi, semm stai sura la Lüna

ma de nutisi sü la strada nanca vüna.

Gh'è aumentad el trafich e l'inquinament

e sigüten a prumètela in tüti i mument

tanto che la costrusion dela tangensial

a l'è stai missa in ogni prugrama eletural.

Intant de sindegh ne pasad vott o des

ma minga de nuità per el paes.

Adess par che sia la volta buna, finalment!

e nüm sem chi tücc bei cuntent.

Ma se anca stavolta gh'an cüntad una bala

passerà alter cinquant'ann prima de fala.

 Profilo

I MUNTAGN

L'è bell in deperti andà sui muntagn,

zaino in spala, rachett in man

tra busc, sass e fiûr

te penset a tutt, anca al Signûr.

Su bell lughid, das de fà

gh'è ne ancamû prima de rivà

ala crus, là süla cima

dûe el coeur el sbatt pusè de prima.

E l'è no per la fadiga ma per l'emusiôn

che quasi quasi te ciapa anca el magôn

perchè da chi sü la vista e el penser van luntan

te par de ves un alter, te se sentet el mund in man.

 Profilo

LA MÈ VERDÜRA

Séler, latüga, erburin,

timm, salvia e üsmarin,

sicoria, cost, erbett,

fenoc, tumates e süchett,

ravanei, basilich, marisana,

crauti, vèrs e valeriana.

Béla, buna, sana, che la düra

questa del mè ort l’é la verdüra.

 Profilo

RIOSS 1973 – 2013

In mess tra autostrada, Lamber e ferrovia

se trôva un sit dûe l'è cà mia,

circundad da campagn e foss

g'hè el paes de Rioss.

Quand sunt vegnüd a stâ chì,

nel mila e novcent setantatrì,

l'era una frasiôn bêla e picinina

cunt quater cà, tre usteri e una gesina.

Un prestinè, dü cervelè, una pusteria

el tütt adree ala stesa via.

E poeu l'asilo, i scôll, quater casîn,

se viveva ben grand e picinin.

Adess, dopu quarantann,

sem tacad a Meregnan

grasie ai piani edilisi

pensad sü cunt pocch giüdisi.

Un sacch de cà, la zona indüstrial

el centro spürtiv, la tangensial

e meno male che g'han lasad per incoeu

un tocch de tera per mandà a giügà i fioeu.

De sicür in chi ann chì Rioss

l'è diventad un paes bel gross

ma el me piaseva püsee quand l'era picinin

e quand supratütt el g'aveva ancamû i casîn.

 Profilo

LA GESETA DE SAN ROCCH

A Rioss, in fund al paes,

gh'è un sit de poc pretes

che pian pianin lè adrè andà a tocch:

la gesêta de san Rocch.

Dedicada al santo Patron

e amada da tüta la populasiôn

da tanti ann lè inagibil.

Una storia incredibil !!

Che brüta roba cunstatà

che i vari Enti stan li a guardà

cunt i man in man, sensa fa nient

intant che crola el monüment.

La solita scüsa lè

che gh'è minga de danè

e intant per tangensiai ed espusisiôn

na tröven tanti de miliôn.

Vegn el suspett che, cume già sücess,

in nom del prugrèss

vören fag fà la fin

che gh'an fai fà ai noster cassin.

Pensemegh ben e femegh atensiôn !!

perchè anche se sem in recesiôn

pödum no mandà in malura

la storia, l'arte e la cultura.

 Profilo

QUATER PASS A PE'

La strada che da Rioss la và a Bescapè

l'è bela de fà anca a pè.

Se caminet tra i campagn

e de luntan se veden i muntagn.

Pasa si una quej vetüra

ma te set in mess ala natüra

e te vedet ran, legur e fasan

fina quasi a Trügnan.

Sensa andà a Bescapè

da chi se pô turnà indrè

e se te cerchet un pû de pas

taia giû per i Furnas

Lì, se te g'hett la gamba buna,

tira driss ala Leuna

dûe sensa strafà

sula ciclabile te turnet a cà.

Per incoeu basta inscì.

Duman l'è un alter dì.

L'impurtant verament

l'è stà ben e ves cuntent.

 Profilo

       LA CUMPAGNIA DEL BIANCHINO

Vundês ur suna i campan

i' hen finid i giaculatori

e cume tüti i setiman

se trovum al bar de l'uratori.

 

E li davanti a 'na butiglia

e un sachett de patatin

se ciciara de tütt, dala famiglia

a quand serum picinin.

 

I temp indre turnen in ment,

ognidün el g'ha la sua de cüntà

e inturna al taul gh'è tanta gent

che speta l'ura de 'ndà a cà a mangià.

 

Gh'è el nonu cul Kisito, el Luigi stradin,

el Bruno e l'Angelino insèma al Savin,

gh'è anche el Claudio, el Gianelia, el Felice Vuluntè

e a la fin gh'è sunt mi cul Carletu trumbè.

 

“Ch'el gir chi la paghi mi

tira sü un alter trebbianino”

l'è nasuda propri inscì

la cumpagnia del bianchino.                                                         

Profilo

LA SENA DELA PRO LOCO

 

Guarda quanta gent, gh'è propi un pienôn

in un atim s'è impienid tütt el salôn

e anca nüm sem chi a spetà

de pudè incumincià.

 

Dela “pro loco” el president,

bel alegher e surident,

el finis de ringrasià

quei che gh'è chi a mangià.

 

El ricorda, cunt bela cera,

che l'incass de stasera

el serviss a finansià

tuti i noster atività.

 

El chef Luca in cüsina,

a l'è fin da ier matina

che el spadela e ghe dà adrè

a preparà piatt da gran gourmè.

 

Antipast favulus,

süghett cunt verdür e nus,

carne, pess, lümagh e ran

gh'è de mangià fina a duman.

 

Scur a fiüm un bel vinell

fresc e bon anca quell

e cunt la turta e el gelato

bevum dell'ottimo moscato.

 

Pecad che adess sem ala fin

e dopu el cafè e un grapin

disum tüti bej cuntent

“se vedum al prosim apuntament”.

 

Profilo